Saturday, December 29, 2007

انت جربت بنفسك؟؟

ياهلا ياهلا اكيد هكون فرحان اوي لو حد لسه بيشوف البلوج بتاعي الناس اه اخبارها.

انا كنت راجع النهارده من الجيش وكانت دماغي فيها شويه افكار كده منها فكرتين متصلتين جدا ببعض اولا موضوع كنا في الفلسفه ايام الثانويه العامه وخلاصه الموضوع ان الانسان بيسأل نفسه اسئله كتيره ونصها ملهوش اجابه تقريبا الموضوع كان بيقول كده مش فاكر والله: انا بسأل نفسي هو ليه في شباب كتير اوي بيكرهوا مصر مع انهم مصريين ده سؤال ملهوش اجابه. محدش يقولي اصلهم مشربوش من نيلها او مجربوش يغنولها !!! كل الكلام ده في الكلتش.

طب برده ليه الناس مش بتحب البلد ده؟؟؟!! مش عارف و مش هجاوب.

طب استنى في ناس بتحبها اوي كنت انا واحد منهم!! لا مش عارف اذا كنت ولا لسه؟؟ خلينا نبص على موقف حصل على بلوج احمد عيسوي في البوست ده ربك لما يريد... يبقي إعفاه بالتأكيد الناس عملت تعليقات اد كده وضربت في بعض من غير اي سبب، موضوع التعليقات (بعيدا عن موضوع البوست) كان عباره عن انت بتحب البلد ده؟؟! طب بتحبها ليه او بتكرها ليه؟؟ بس خليني ااقول حاجه عاوز بجد تختبر نفسك انك بتحبها لا بلاش ااقولها بطريقه تانيه عاوز تعرف اذا كانت البلد ده تستاهل اصلا ان الواحد يحبها ادخل الجيش بس اسبوع من غير الدخول في اي تفاصيل هتلعنها وتلعن اليوم الي قدمت فيه للجيش وتلعن انك ولد وتلعن انك فيها بغض النظر على تعليق اخوك في الله على اخر موضوع ليا الي بجد ريحني كتير مع اني مش انا الي بحمي البلد ولا حتى سبب في كده. بس ده برده مش الموضوع الي عاوز اتكلم فيه كل الناس الي علقت على موضوع احمد عيسوي ربك لما يريد... يبقي إعفاه بالتأكيد مدخلوش جيش ولا اي حاجه ناس بتشتم في البلد وهما اصلا مدخلوش جيش ولا شافوا الذل هناك (تحت اي سبب، ذل الجيش اسوأ من اي ذل في الحياه الملكيه) وناس بتحب البلد وبدافع عنها اوي برده وهما متئرسوش منها، انا غيرت انا فخور اني مصري علشان انا مش فخور بكده اد ما اني فخور اني مسلم دلوقتي بس حسيت ان التعصب للوطن حاجه غلط وان التعصب المفروض يكون للدين انا فخور اني مسلم اني بجد حسيت اد اه انا في نعمه اني مسلم واد اه انا في ذل اني فالجيش المصري، عاوز تحب مصر غمض عينك!

7 comments:

Ahmed Mubarak

ازيك يا قشوع..بجد وحشتني أوي يا ولا..انا لو مشفتش رامي محروس مكنتش جيت البلد دية ..
:D
وأهلا بيك والله الواحد افتقد البوستات اللذيذة بتعتك

بالنسبة للموضوع..طبعا انت عارف انا اتربيت فين..وعارف كويس انا كنت متعصب لمين..وعارف كويس انا كنت بفتخر بمين..

بس اكتشفت حاجة ..ان البلد دية متتحبش او تتكرة علشان ناس فرضوا علينا واقع سيء..
الرسول (ص) الي انت بتفتخر بدينه خرج من مكة بعد تعذيب وبهدله قويين..ورغم كدة قال في ما معناه

والله إتك لأحب أرض الله لي ولو أنهم أخرجوني منك ما خرجت

بلده بيحبها ومكرهاش علشان شوية ناس فرضوا روتين سيء..نفس الي بيحصل معانا دلوقتي من سوء الحكم والقوانين..الناس الي بيحطونا في حاله اليأس زيك كدة..اعمل زي الرسول ..حاول انه يصلح بلدة وصلحها بعد 8 سنين من هجرته..نحاول نبنيها أحسن..
أنا عارف إني بقول كلام من الخيال العلمي..بس:
تعرف يا روميو..انا كنت متعصب وانت عارف لأي دوله..بس سالت نفسي سؤال..لو قامت حرب هتحارب للدوله دية ولا لمصر؟؟
متهيألي السؤال دة بينهي أي شيء..

واهلا بيك يا روميو
:D

khaled adel

يا اهلاً يا اهلاً بجنود الوطن البواسل

السلام عليكم
اكيد طبعاً لسة بنقرا البلوج بتاعتك مهي بتطلع ف ال google reader غصب عننا

المهم هو تعليق اولاً على كلمة تعصب دي
هي لا تصح لا لوطن ولا لدين ولا لأي حاجة تانية , ممكن تسمي شعورك ناحية الدين انتماء او ولاء بس مينفعش تعصب
اما عن حب الوطن او حب مصر فانا رآي من رأي مبارك
قصدي يعني احمد مبارك احسن تفهمني غلط
ان فعلاً حبنا لبلدنا مش المفروض ييجي نتيجة معاملة الناس فيها لينا
والمفروض حبنا لدينا ونتمائنا ليه ولبلدنا هو اللي بيحركنا عشان نقدر نعمل تغيير
والناس اللي بيكرهوا بلدهم فده ف رآيي بيبقى غالباً نتيجة التأثر الزايد عن حده بالثقافية الاجنبية والانبهار بيها , هو طبعاً في حاجات برة تعقد وتخلينا نبص لنفسنا بأحتقار بس ده للناس اللي بتبص للبلد على انها مكان وبس بنعيش فيه والمفروض يبقى كويس لينا , لكن المفروض ان البلد دي مكان بنعيش فيه واحنا اللي بنخليه كويس لينا ولغيرنا
يعني لو البلد وحشة من الآخر -ودي حقيقة ف حاجات كتير- يبقى المفروض اننا نغيرها مش اننا نكرهها

Rehab Mostafa

طبعاً لسه متابعين :) عيب عليك يا رامي (tenek :P)

والله يا رامي ماكنتش أتوقع خالص انك تقول الكلام ده
فاكر يا رامي لما أنا كتبت بوست شباب اليومين دوول وانت كنت أول تعليق وقلت ان الشباب كويس ولما يتحطوا في موقف هيسدوا فيه راجع نفسك يارامي مش انت اللي تقول الكلام ده
بصراحه برضه أنا مع كلام أحمد وخالد
وخصوصاً لما خالد قال لو البلد دي وحشه في حاجه نحاول نغيرها مش نكرهها
غلطتك يارامي انك كنت متعصب ليها أوي واتصدمت لما دخلت الجيش أنا مع خالد برضه لما قال انك المفروض ماتتعصبش لأي حاجه ... علشان لو حبيت حاجه أوي واتصدمت فيها هتقلب عليها 180 درجه

ماتكرهش البلد يارامي بجد وحاول تصلحها وماتغمضش عنيك اعمل اللي عليك واللي يرضي ضميرك وخلاص

Mohamed Meshref

Actually there's a huge difference between hating the country and between hating the people and between hating the system, they are totally three different things.

For me I love the country so much, I don't like the people these days (we all know why), and I hate the system like hell

Ahmed Essawy

ربنا معاك يا رامي ... انت و باقي الشباب الي معاكم دلوقت ..
==
طبعا يا رامي ..حنفضل نقرا البلوج بتاعك ..ازي ننساك يعني !!! تيجي ازاي يا رميو ؟؟
:)

حب الوطن و الانتماء للدين
حاجه واحده
مش حاجتين
فطرة فطر الله الناس عليه ... بشر و غير بشر ...
زي ما بتشوف الطيور لما بتهاجر ...بترجع ازي تاني رغم بعد المسافات و هي عماله تغرد من فرحه الرجوع ...و البشر كدا ... الواحد لما بيسافر برة بلده و يمكن سايبها علشان طفشان منها و من ناسها ... وشوفو و هو راجع ...بيرجع مشتاق و فرحان ازاي ؟؟؟
دي فطرة من الخالق و مينفعش تتغير ...
بس كل حاجه ليها ثمن ...مينفعش اقول انا بحب او بعشق فلان و لما اشوفو في خناقه مثلا اسيبو ولا كأني شايف حاجه او مثلا الشئ الي بتحبو لما يطلب منك حاجه ...متعملهالوش حتي لو فيها تعب عليك .....
معني كلمه الحب ...انك تحب الشئ دا علي جميع الحالات ..و الاوضاع ...
تاخد منه و تديله
مش بحبو لما يكون كويس و لما نشوف مشاكلو ننفر منه و نبعد عنو ...
انت و انا اخدنا من الوطن دا كتير !!! يا تري ادينالو ايه ؟؟؟
الي فاكر ان الحب تاخد و من غير هات ...يبقي مش فاهم معني الحب صح ...
حب الوطن هو اجبار النفس على الالتزام بانظمته والالتزام بالمحافظة عليه حتى
وان رافق ذلك عناق و جهد .
مثال بسيط جدا
مينفعش اقول انا بحب الوطن و انا برمي زباله في الشارع ...او ما شابه كدا في خلل في حب الوطن ..
الخلاصه :
طلاما انت شايف و انا شايف و غيرنا شايفين ان في حاجه غلط في الوطن ... يبقي وجب علينا كلنا من منطلق حب الوطن اننا نعمل الي علينا ... و لو مش علشان حب الوطن يبقي علشان ربنا و نفسنا .. نحاول نغير الشئ الي احنا شايفينه غلط ..
التغير دا مش لازم يجي بسرعه و مش بيمنع حدوثه بسرعه ...سواء يجي مننا من ابنائا ...المهم اننا نكون عملناالي عليك ...ادام الناس كلها و ادام ربنا ..و ادام الوطن

AdrY

Ezyk ya ramy, awel mara aktblk 3la ur blog , bs kalamk kan lazim arod 3lyh

tyb nbtdy ezay , tyb khlyny a2ol aywa, sa7 kolo elli bt2olo sa7 , we lazim lazim yt3'ir

2oly r2yk shayef el gysh mmkn ykon ezay , 2oly el e7tram feeeeh 3yzo ezay , el nas btt3lm feeh ezay

ana msh 3aref en feeh zol kter , ana ma dkhltsh el gysh , ht2ol msh 3aref 3lshan ma shoftsh

tyb lw oultk fe nas a3rfhom dkhlo we khlso we khrgo , we by2olo la2 , el gysh da 3'yrna we 3mlna regala we et3lmna mno kter gdn (fel 7ayah)

khlyna ntf2 en dlw2t nos el welad lazim n3yd nzar fe no3ohom el maktob fel bta2a , lazim yb2a fe haga t3rfhom ya3ny a donia , el donia msh e7tram ya ramy , el donia msh nzam, el donia msh enk tb2a shayef kol haga sa7 we 3yzha sa7 ,
ana b7s sa3at en zol eli fel gysh da m3mol btry2a mdrooosa we enhom asdyn kda, 3lshan fe welad byb2o fe awel 20 mn 3omrhom we lmo2khza ya3ny .

tyb enta 3aref lw dkhlt masr 7arb we ro7na 3lshan n7arb , hnb2a 3yshyn ezay, tyb 3aref lw w23t asir fe eyd 7ad mn el a3da2 htb2a 3amel ezay , tyb 3aref ya3ny a mmkn ttrmy fel sa7ra l7ad ma tmot mn el gooo3 we el 3atsh , ana a3rf nas 7slhom kda fe 67 , etrmo fe s7rt syna we 2llhom amr bl2nsa7ab (mashy 3la rglhom fe el s7ra we wust el gbal)

ya 3m sly 3la el naby , at least enta fe akl bygy l7ad 3ndk , ht2oly da msh akl wala bta3 da haga zay el .... , a2olk kefaya enk lma ht3tsh htshrb maya , even 7ta lw kant sfra zay ma so7aby ma kano byshrbo.
elli 3ayz a2olo , e7na b2yna morfhyn zyada , b2yna 3yshyn el mdnya bm3na el klma, tyb a2olk fkr 7ba kda kam ( ragel ) mn shbbna el homam y2dro ysdo sa3t el 7arb

ana a3rf nas walahi ya ramy kano bytkhn2o fel gysh 3lshan y3mlo el tdrybat de kol youm , we ygro kol youm , we yroo7 drb el nar bl RBG ,
we y3mlo msh 3aref a kda fe ekt7am el mowak3 we kda

akhir haga , howa elli etzl , msh y3rf ya3ny a m3na klmt 7orya
we elli ga3 we etbhdl ya3rf ya3ny a shb3 we 7orya we rfahya , we lw enta kwy el mol7za , bos fe 3z el 7ar 3la el nas fel shar3 , we enta htakhod balk mn el fr2

m3lsh twlt 3lyk ya ramy , 3ayz ashofk orib b2a isA , we 3o2bal kda lm tkhls ya gameeeeel :)

KhaledEssawy

ايه يارامى اكيد مش هتنسي جدو اللى كان جنبك فى العنبر.. :)
وبيصحيك كل يوم الصبح وبلاش اكمل :)
بزمتك ماضحكتش لما افتكرت الايام دى والبلاوى اللى كانت بتحصلى وانت واقف جنبى .. فاكر يوم ماشيلت الرمل والظلت والسرافيس كل كنت بشلها كل ما ننوي ناكل فى الميز .. :)
مش كل اللى حصل ده وانا معاك فى الجيش بس كنا بنضحك على كل موقف اقع فيه
هو ده الجيش شوية حلو وشوية جد وصعب يحتاج رجالة تمسك اعصابها ومتنفلتش..
خد الامور بسهولة وبلادة بجد والله مش بهزار ... على فكرة انا شايف اننا لما دخلنا الجيش احسن بكتير من البشاوات اللى اخدور اعفاء .. لأننا بجد نقدر نتحمل ضغوط رهيبة عنهم يبقى احنا كدة رجالة احسن منهم. هو فعلا فى ذل وامتهان شوية بس ده طبيعى لأنه لو كان غير كده ميبقاش جيش او حياة عسكرية متخليش الجانب السلبي يطغى عليك خلي حبك للجيش وحبك للبلد اكتر وادعى ربنا انه يوسع صدورنا على تحمله لانه فعلا محتاج سعة صدر
بس بجد عجبتنى كلمتك "انا مسلم" بس ده لا ينافى ابدا حبك لمصر وانك تقول "انا مصري" فالكل واحد
مع تحيات الجندي جدوووو
والله المستعان والمعين