Saturday, July 18, 2009

قصيده سلام سلاح للقائد العظيم

بكلم احمد عماد صديق طفولتي في الكليه وعمري فالجيش وافتكرت القصيده الي كتبهالي قولت لازم احطها هنا علشان محرمش الناس منها =>


بداية الكلام سلام لكل جندي
من غير حتى انتباه ولا يابني اجمع عندي
لكن سلام سلاح للقائد العظيم
مجند اركان حرب استاذ رامي افندي


قائد كبير معظم في جيش مصر الهمام
واهو اي حد في مصر بقى قائد والسلام
لكن حبيبنا رامي أسد شجاع مقاتل
لو تطلبه منه حاجة يعملها في المنام


بيتعب هو خالص من اشغاله اليومية
دا بيعمل ترن ان للاجهزةبحنية
بيدوس بايده الطاهرة على زرار الجهاز
ربنا يحملنا ايده ويولع فيكوا وفيا


ماهو إحنا مش مهم اهم حاجة هو
شغله كتير يا ناس وكله نشاط وقوة
بجيبه من العنابر نايم من كتر شغله
بيقوم ينام وفي حلمه بيكمل شغله جوه


ماهو اصله شاب خارق وعابر للقارات
يقدر يطبع في اليوم حوالي 7 ورقات
ومصر بحالها ديه أمانة في ايده هو
ربنا يستر على مصر ماهو اصله بتاع حركات


رافع للضغط هو وفاتح للشهية
لو شفته أكيد هتاكله من كتر الألمعية
يا إما يا مسكين هتقعد تاكل في نفسك
ماهو اصله يا ناس دكتور وإحنا شئون شخصية


وفي المواقف الصعبة بطل مالوش مثيل
لو تعتمد عليه يبقى هتندم يا جميل
هتلبس في الحيطان وكام عمود كمان
لكن عذره معاه ماهو اصل الحمل تقيل


بينام في اليوم حوالي 23 ساعة
والباقي يدوب هياكل وكام دقيقة صياعة
يبقى هيجيب يا ناس وقت للشغل منين
لو تحسبها تلاقينا فعلا بشر طماعة


لكن مع كل هذا واكتر منه كمان
ما اقدرش يعدي يومي ويمكن يجيلي جنان
لو ما شفتوش يا ناس ورغيت معاه شوية
بيهون كل شئ ونرجع للروقان


وما يهمكش يابني كمل نوم للنهاية
إن شاء الله الدنيا تولع او تتسجن معايا
ما دمنا في النهاية هنتروق سوا
ريح و نام وعيش واهو كله على قفايا

Friday, July 10, 2009

اشحنلي لو سمحت

كان نفسي اعمل البوست ده من زمان بس مش عارف ليه كل ما كنت اجي اعمله انسى او اتشغل المهم انا حصلي موقف لا اتنين هما زي بعض بس مختلفين في النتيجه.

طبعا كلنا بنحول رصيد و بيتحولنا رصيد وبتختلف يجيك او يروح منك حسب ظروفك الاقتصاديه وظروف اهلك

اخويا بيبعتلي رصيد شبه يوميا :) مش قلنا حسب حالتك الاقتصاديه فا مره غلط رايح باعت 20 جنيه لحد غيري طبعا انا قولت الحق ميزعلش ودول برده يا جدعان 20 جنيه ومش لازم نفتري على النعمه رحت هوب مكلم الست طلعت ست الي اتحولها الرصيد

انا: مساء الخير
هي: مساء النور
هي: مين معايا
انا: قولتلها اخويا بعت لحضرتك رصيد بالغلط ولومفهاش ازعاج ممكن ترجعيلو الرصيد تاني
هي: هو اخوك؟؟ دا انا بحسبه السنترال
انا: لا اخويا هو الي غلط
هي: معلش يابني اصل صرفتهم كلهم (مع اني كانوا لسه مبعوتين). بس تقول ايه بقى
انا: قلتلها حصل خير شكرا مع السلامه

انا بقى كنت ببعت رصيد بس مش لأخويا المهم بعتهم غلط وكانوا 5 جنيه احب اذكر سيادتكم انه حسب الحاله الاقتصاديه بس غلط قولت بص بقى مش هكلم حد لحسن يقولي دا انا بحسبه عم عبده البواب شحنلي و قولت 5 جنيه والحمد لله مجتش في حاجه كبيره

لقيت رساله جيالي من الرقم الي بعتلوه الرساله غلط بالمبلغ انا تنحت قلت طب ازاي رحت بصراحه قولت اكلمه اشكره لأقيته شاب صوته محترم جدا راح قيلي لا العفو انا حسيت برده انه اتبعت لط علشان انا معرفش النمره ديه قولتوا جزالك الله الف خير وبجد الناس ديه الي بتخلي الواحد يرجع يقول الدنيا لسه فيها خير :)

Thursday, July 02, 2009

حما الله لينك وشعب لينك

حماكي الله يالينك وحماك الله يا شعب لينك يوم غريب جدا جدا….

الواحد كان قلبه مقبوض مش عارف من ايه ومره واحده يجي زلزال انا قولت لا انا دايخ علشان منمتش كويس لا طلع بجد زلزال و الناس كلها قامت تقف و خوف و ضحك في نفس الوقت. انا بتكلم عن الدور بتاعنا مش عاوزين نقول ايه اللي حصل في بقية الادوار يا عالم يا فرافيير :)

وبعدها الدنيا اشتغلت عادي و هوب الكهربا اتقطعت المولد راح اشتغل هوب المولد جاب جاز هوب روحنا ملمين حاجتنا وقومنا مروحيين

ربنا يحمي لينك وشعبها ب برده مفيش مانع ان حركة الكهربا تقطع في الاسبوع مره D: