Friday, November 28, 2008

بعد 13 شهر اتعلمت اه؟

بسم الله، كنت بفكر في الموضوع ده بالظبط لما قولت مائه يوم يا جيش، بس كنت بكسل اكتب في اي حاجه، والنهارده فضلي 19 يوم ان شاء الله و يعدوا على خير بدأت فعليا اكتب و أقول للناس انا شخصيا اتعلمت اه من الجيش بلاشك ان الجيش اسوأ تجربه اي بني ادم ممكن يمر بيها و برده مما لاشك فيه فا تغيير نمط حياة الانسان بيكسبه خبره، و الانسان اه غير دم و لحم وشوية خبره فوق بعض :)

بس بجد الموضوع ده مش زي الي قبله من المواضيع، الغرض منه اهزر او اضحك او اعرض معلومه جديده او حتى مش علشان اتسلي. الموضوع ده علشان الي مدخلش جيش يعرف اد اه ربنا انعم عليه و ازاي حياته فقدها شوية معاني

1- الصبر

2- قله الادب مع قليل الادب

3- التعامل مع فئات مختلفه من الاشخاص خصوصا اصحاب التعليم المتوسط و الفلاحين الي عندهم مكر الدنيا و الاخره

4-  ازاي اني اريح و أنتخ في عز الدنيا ما بتكون مشعليله ( تقدر تقول الراحه تحت ضغط)

5- ازاي استعبط القائد بتاعي وابينلوه من غيري الدنيا متمشيش و مع ذلك انا مش بشتغل خالص

6- مأمنش لحد لمجرد ان شكله ابن ناس

7- فصل شخصيتي عن البيئه الي عايش فيها - حكمه في الجيش بتقول- ارمي ابوك و امك بره باب الوحده و اقلع بدله الكرامه علشان تعرف تعيش.

8- انك تستخدم مبدأ المصلحه المشتركه - مفيش انك تعمل حاجه لله و الكلام الي ميكسبش ده-

9- ان موضوع ان الي بيدخل الجيش (الكليه الحربيه/الكليات العسكريه) بيتعلم الالتزام كلام كدب. الضابط بيبقى عاوز عسكري يدخل الحمام معاه يليفو و هو بيستحمى مبيعرفوش يعملوا حاجه من غير عساكر. اسوأ غرفه تشوفها في حياتك غرفة الضباط بيمشي منها و هي في غايه القذاره علشان عارف ان في عسكري هيجي ينضفها.

10- ان الحياه الملكيه اكبر نعمه، اتعلمت اني اخاف اعمل حاجه غلط اتسجن فيها مهو الي جرب جيش يخاف يرجعله تاني

11- اني ارمي الوقت في سبيل حاجه تيجي، ازاي اضيع وقت سبحان الله

12- ان كل واحد فينا بشوف الساعه و يحس بيها بطريقه مختلفه تماما

13- اني في عز رحتي و فرحتي اعرف ان في ناس بتتعب اوي - اني في عز البرد و الساعه 3 بليل في ناس بتقوم علشان تستلم سلاح و تقف في عز البرد- وبعد كده يعملوا اعمال نضافه منها يرش ماء في عز التلج و انا نايم مستريح اوي

14- ان بجد في الحياه الي تعبان الناس بتتعبوه اكتر و المستريح بيريحوه اكتر

15- ان الواحد مهما كان الي فيه مبيحمدش ربنا ( او الي هي الحمد لله يا عم تقضيه واجب)

16- انك ممكن تعمل حاجات لو سرحت فيها تقول لنفسك انا مستحيل اعمل كده (بس لما بتتحت فيها فعليلا بتعمل)

17- انها لما بتقفل معايا مبتسويش

18- اني اكل بصل بجميع انواعه و كمان البلح الاصفر المرطب

19- اكره الضباط و الصف وممكن اضرب حد لو بس شوفتو اتشاكل مع حد

20- الاب  الام اغلى ناس عند الواحد في الدنيا بس مبيخودش بالو الا لما يفارقهم لمده طويله

21- قربي من بعض الناس واصبحوا من احب الناس لقلبي

22- توجيه بعض الناس ليا اني بلاهدف او مش محدد انا عاوز اه و بالتالي بدأت اصلح حاجات كتير فيا

23- تطبيق بعض النظريات في الي استحاله  كنت هعرف الاقي معمل زي الجيش جميع اصناف الناس موجوه فيه (Organization Behavior)

ممكن يكون في تاني بس انا ناسي بس الاكيد لما افتكر هقول