Saturday, December 22, 2012

يوماً ما

يوماً ما سوف نستقل سيارتنا الكوبيه يا حبيبتي ونطير بها على طول ساحل ميامي بسرعة لا تقل عن 150 كم/س ونسمع أغنية رايو شاين اون... يوماً ما...

يوماً ما سوف نجلس على شاطئ كيب تاون ونشرب ماء جوز الهند في نصف الثمرة والنصف الآخر كشطائر نأكلها ونتذكر الأيام التي قضيناها نتحدث وبيننا مئات الأميال تبعدنا ونلعنها... يوماً ما...

يوماً ما سوف نذهب في رحلة لدعوة غير المسلمين لدين الله، النعمة التي لا تعدلها نعمة وسوف تكون هداية رجل لدين الله رصيدنا عند الله تعالى به نتخطى عوائق الحياة... يوماً ما... سوف لا يكون هناك شهر عسل سوف تكونين أنتي عسل العمر... يوماً ما...

يوماً ما سوف نجلس على الأريكة نشاهد فيلم وأستنشق الهواء الذي يمر بين خصال شعرك وتفكري وتتسائلي لما لم يعطيكي الله حبيب رومانسي مثل البطل... يوماً ما...

Review: Never Eat Alone: And Other Secrets to Success, One Relationship at a Time


Never Eat Alone: And Other Secrets to Success, One Relationship at a Time
Never Eat Alone: And Other Secrets to Success, One Relationship at a Time by Keith Ferrazzi

My rating: 4 of 5 stars



كتاب بيعرفك طرق إزاي تبقى رجل ذو علاقات ناجحة، عيبه أن رغااااااي جداً، في بعض الأوقات هتمل وفي بعض الأوقات هتحس أنك لازم تبقى برجماتي اوي... خد منه ما يتناسب مع مبدئك... شكراً صديقي محمد شعبان على ترشيحه للكتاب



View all my reviews

Friday, December 21, 2012

كيف تكون سعيداً؟

كتبت الإستاتيوس ديه https://www.facebook.com/RamyAMahrous/posts/10152358902310384 أول إمبارح وكنت بايت في الشغل، وده مش دايماً بيحصل، يعني ممكن اتأخر ساعة ساعتين.

المهم، جه على بالي شيء، إنك لازم تشتغل على سعادتك وسعادة غيرك، بس ممكن تعمل لغيرك كتير وميبقاش سعيد، بس أنت أكيد عارف إزاي تسعد نفسك، وتحدد الحاجات الي تسعدك، وادام الحياة ماشيه وبنعيشها بكل حلوها ومرها، مفيش الي يمنع أننا نقف ولو ساعة مع نفسنا، نحدد فيه إزاي ابقى سعيد...

ضروري جداً قراءة المقال ده لـ د. مصطفى محمود http://ramymahrous.blogspot.com/2010/12/blog-post.html وإن كان مقال طويل بس إسلوبه وروعته وحقيقة كلامه هتخليه قصير جداً.

لما كتبت الإستاتيوس، كتبتها بشكل عشوائي مختصر اوي، وحبيت هنا -وده سبب كتابة الموضوع كبلوج- إني أوضح شوية حاجات وممكن أزيد... خلينا نتفق أن الحاجات ديه بتخليني أنا سعيد فا ممكن تشتغل معاك وممكن لأ وتاني حاجة إنها مش مترتبه :)


1- حافظ على فروضك
مفيش شيء يجعلك سعيد أد كونك عايش في سلام داخلي وراحة نفسية وطمئنينة، وأنا متأكد من إنك لما تكون متمم واجباتك وفروضك تجاه الله سبحانه وتعالى وبكل ما أمرك به، كافي بسد كل أبواب تأنيب الضمير والحزن الناتج عن تقصيرك، فتأدية الفروض بيضمن ليك الراحة الأساسية، مهما كان درجة حزنك، عندما تستشعر بوجود الله فيك وحبك له بعدم مخالفه أمره، بيجعل أي شيء بعد كده في حدود الإستطاعة مهما صعُب، وهين مهما كان عظيم.

2- كل يوم تكلم صديقك المقرب
لكل واحد مننا صديق مقرب، الأنتيم زي ما بيقولوا الفرنجه، ده لازم يتقضى معاه 10 دقايق مكالمة او تشات، انا بحس بسعادة لما بكلم صديقي، وبنحكي وبنشوف وبنقول أرائنا بكل أريحية، بتحس إن أفكارك في بيتها ومش هتتكسف إنها تتصرف بحريتها، عكس لما تكون مع الناس، الظروف كتير بتقيد حرية الأفكار مش علشان هي سيئة، بس علشان تريح دماغك وتقصر المناقشة.

3- كل يوم تسأل عن حد من عائلتك
صلة الرحم وإن كانت من الفروض وتم مناقشتها في النقطة الأولى إلا وإن أهميتها يخلي الواحد ينفرد ليها بنقطة مستقلة بذاتها، فاصلة الرحم سبب لصلة الله للواصل لها، وكيف يكون حال مّن هو موصول بالله وبرحمته؟

4- كل يوم تتصل بحد تعرفه
في كتاب Never eat alone لـ كيث فيرازي، قال إن العلاقات بين البشر زي رعاية النباتات، إهمالك لها يعني موتها وإن كان مكنش بنفس اللفظ، المهم أن لازم تبقى على علاقتك بكل إنسان عرفته، ممكن المكالمة تبقى وأنت في الأسانسير وتاخد 15 ثانية بس، أزيك عامل ايه؟ أنا حبيت أطمن عليك، أسمع عنك كل خير. أكيد الشخص ده هيرد لك المكالمة في يوم من الأيام، ساعتها هتبقى سعيد أن في حد بيسأل عليك ومش محتاج غير أن يسمع إنك كويس.

5- كل يوم إنجاز في شغلك ولو صغير
الشغل هو المسئولية الي كلفك بيها صاحب عملك، الي بتشوف بعين الآخرين تقديرك لك بها، إنجاز الشغل هو الترجمة الفعلية لـ انا قادر على تحقيق المزيد وإني أفكر بشكل مختلف، الإنجاز ممكن يكون بشكل مختلف وهو إنك تساعد زميل العمل على تنفيذ عمله بشكل أكثر إحترافيه وعمليه، تغيير في إجراء الشركة لعمل معين وهكذا، مفيش شيء يسعدني أكتر من أني انام وأنا حاسس أن عملت شغلي كويس.

6- كل يوم تعرف معلومة جديدة
بحر المعرفة لا ينضب، والوقت يتسع لمعرفة كل يوم معلومة جديدة، مش لازم تعرف معلومة كبيرة او نظرية علمية معقدة في مجال غير مجالك، وياه لو عرفت تخليهم معلومنين، معلومة دينية في العلم الشرعي ومعلومة في العلوم الدنيوية والأجمل إنك تشاركهم غيرك، وأعتقد وجود الشبكات الاجتماعية مثل فيسبوك وتويتر وغيرهما قادر على توصيل المعلومات لشريحة كبيرة من الناس. إحساسك بإنك مصدر معلومة لغيرك وإنك بتطبق زكاة العلم على نفسك شيء يدعو للسعادة بجد، وكون حد يفتح موضوع وتبقى عارفه او تثري جلسة مع الأصدقاء بمعلومات من مجالات مختلفة ومتعدده.. أكيد هتشعر بالسعادة.

7- كل يوم حد بتهتم بيه بتكلمه
العناية والإهتمام بالأشخاص شيء مفرح، كفاية بتحس بسعادته لما تسأل عليه وعمل أيه في الموضوع الي كلمك فيه او المشكلة الي كان واقع فيها وتشاركه حلول لها وفي الأخر يدعيلك.

8- كل يوم تقرأ ولو حتى 10صفحات من كتاب
القراءة بتوسع مدارك العقل بشيء غريب، أنا كنت شخص وبعد إدمان القراءة أصبحت شخص تاني، القراءة بتخليك تعيش حياتك بالتوازي، يعني لو قرأت عشر كتب في عشر شهور كأنك عشت 100 شهر = تقريباً 8 سنين، بدون مبالغة أنت بتعيش تجربة إنسان في موضوع (طبعاً حسب نوعية الكتاب وقوة أسلوب الكاتب)، القراءة بتخليني متأمل في الحياة بتخليني أعرف أفسر حاجات كتير بتحصل وأحسبها من الجانب الإجابي، القراءة بتخليني فعلاً أبتسم وأعتقد وأصدق أن ما على الأرض يستحق الحياة.

9- كل يوم رياضة ولو حتى هتمشي كم واحد
الرياضة لها أهمية كبيرة بتفريغ الطاقة السلبية من جسم الإنسان أو خلينا نتكلم بشكل علمي أدق إنها بتخلي الجسم يفرز "الاندروفين" وهو هرمون السعادة، غير إن إحساس الفرد بطاقة في جسمه ونشاط وأنه قوي بيخليه سعيد، وأكيد أحسن من الإنسان الي بيصحى من الشغل وعنيه مقفّله ويروح الشغل ويقعد على المكتب وهو مش قادر حتى يفتح عينه.


10- كل يوم لازم لما تقابل حد تقوله صباح الخير
سنانك مش عورة، أبتسم، أبدأ يومك بصباح الخير لكل واحد تقابله ده هيزيل اي توجس منك، لاحظ أنك لما بتسلم على حد وأنت قاعد في أي مواصلات ويحصل موقف مثلاً أنك تخبط فيه ، بيتقبله وكأن أبنه هو الي خبطه، غير إدخال السعادة على الناس، غير أنه صدقه بتبدأ بها يومك، المعادلة بسيطة سعادتك = سعادتك + سعادة الي حواليك بسببك.

11- كل يوم تتكلم مع أبوك وأمك
الحياة ساقية وفعلاً لما الواحد مش بياخد باله بيصبح جزء منها، ولا عارف يطلع منها ولا عارف يوقفها، الأهل هم الي ضايعين من حياتنا، زملاء الشغل معانا 8 ساعات على الأقل وبتخلص وبتروح على بيتك (لو أنت متجوز) او على أصحابك غالباً، وبترجع "الفندق" تاكل وتنام وساعات تنام وتصحى وأهلك نايمين تروح الشغل، وهكذا. ضروري تشارك أهلك حياتك ومواقفها وياريت السعيد منها وتدخل على قلوبهم الفرح والسرور، ولو فعلاً واقع في موقف صعب، بتضمن إخلاصهم وتجردهم لله في النصيحة، خبرة + عدم إنتظار مصلحة منك، كمية الراحة النفسية الي بتستمدها بالكلام مع أبوك وأمك بتحس إنك رجعت لعالم بريئ اوي، تقدر تعيش فيه بكل أريحية.

12- كل يوم تحاول تفيد اي حد تعرفه بمعلومة
المشاركة إهتمام وعناية، إبتسامك الي قدامك وهو بيعرف منك شيء لأول مرة، شيء هيخليك في السما، حاول تختار الوقت والإسلوب، الوقت علشان يكون فايق قدامك أنه يسمع شيء جديد ويثبت في دماغه، والإسلوب علشان الشيطان ميقنعهوش إنك بتتنطط عليه.

13- كل أسبوع الأجازة تعمل فيها حاجة مختلفة
تجديد النشاط وكسر الروتين، بيسعد الواحد وبيخليك تكسر كل الحواجز الي تحطك عليك، ممكن تفكر تروح الشغل في يوم من طريق تاني، لو هيكون مثلاً أبعد عنك، تاخد أبوك وأمك وتعزمهم على الغدا برة، كده يعني.

14- كل شهر على الأقل لازم تعمل تجربة معملتهاش قبل كده
نفس رقم 13 أصل أنا تعبت من الكتابة بصراحة :)

Monday, December 17, 2012

Review: أحببتك أكثر مما ينبغي


أحببتك أكثر مما ينبغي
أحببتك أكثر مما ينبغي by أثير عبدالله النشمي

My rating: 4 of 5 stars



روايةحزينة... صدقا أعرف بطلتها... لم يعجبني سلوك جمانة، أستفزني عزيز... الكاتبة لها لغة جعلتني أمثل الشخصيات كما تحكي هي عنهم عندما كنت اقرأ... طريقة جمانة أوشكت أن ألقي بالتابلت على الأرض هي كالشعوب السلبية تشعر بالإهانةولا تثور، النهاية واقعية وإن لم يرق لي الطريقة...
براڤو أثير...
أتمنى أن تحبي إمرأة كما أحبت جمانة عزيز



View all my reviews

Sunday, December 09, 2012

Review: معذرة إلى ربكم ولعلهم يتقون


معذرة إلى ربكم ولعلهم يتقون
معذرة إلى ربكم ولعلهم يتقون by مصطفى بن العدوي

My rating: 3 of 5 stars



كتاب يسرد المخالفات الشرعية في الدستور مادة مادة، ويبيّن أن الدستور لا علاقة له بالإسلام شكلاً وموضوعاً، أختلف مع علمي البسيط في بعض النقاط، مثل تحديد فترة الرئاسة فالشيخ يقول لا أصل في الشريعة بتحديدها وأنا أقول يا شيخنا الكريم لا أصل في الشريعة لا يحددها.. مسأله تقبل الإجتهاد، وتولية المرأة أيضاً في بعض الوظائف فيها إختلاف، لا أتكلم عن الولاية العامة، وأيضاً المظاهرات، لما تُرفض المظاهرات السلمية؟!
في المجمل، هذا تأكيد لنفسي أن أرفض هذا الدستور.



View all my reviews

Wednesday, December 05, 2012

Review: كتاب التوحيد


كتاب التوحيد
كتاب التوحيد by أحمد عبد الرازق البكري

My rating: 4 of 5 stars



محتاجين بجد العقيدة... كتاب مختصر عن عقيدة أهل السنة والجماعة ويفتح الآفاق لتعلم المزيد



View all my reviews

Monday, December 03, 2012

Review: دستور دولة آدم


دستور دولة آدم
دستور دولة آدم by Mahmud Abuzeid

My rating: 2 of 5 stars



كتاب ظريف كان ممكن يطلع بشكل أحسن وبنفس الإسلوب الساخر



View all my reviews

Review: دستور دولة آدم


دستور دولة آدم
دستور دولة آدم by Mahmud Abuzeid

My rating: 2 of 5 stars



كتاب ظريف كان ممكن يطلع بشكل أحسن وبنفس الإسلوب الساخر



View all my reviews