Saturday, May 02, 2009

الجواز في مصر

انا محبط فعلا....
محبط من كل شئ. مش معقد يعني لا محبط بخصوص موضوع الجواز في مصر بالاخص الفلوس الي بيدفعها الراجل علشان يتجوز يا حسره...
تعالو نحسبها حسبه حلوه
الشقه 100 الف جنيه
العفش 25 الف جنيه
مهر 10 الالف جنيه
شبكه 10 الالف جنيه
تكاليف فرح 10 الاف جنيه
تكاليف بقى الخطوبه و خروج و هدايا قول الفين جنيه
الحسبه هتبقى كام = 175 الف جنيه وعلشان محدش يقولي انت مبالغ نقول 150 الف ونقول متوسط مرتب الشب المبتدأ 1000 جنيه ومحدش يشتم ويقولي 150 جنيه وكده احنا بنقول المتوسط 1000 في ناس أكتر و ناس أقل
يبقى لازم الشب يشتغل 150 شهر او 200 شهر علشان يتجوز يا فرحتي :) 16 سنه
وطبعا البنت مش عاوزه تقعد في شقة اهل جوزها وطبعا اهلها عاوزين حاجات اد كده ممكن تعدي المبلغ الي فوق. فا انا شايف للشباب انها صفقه خسرانه. للبنات و لا فرقا معاها. ليه السوأل ليه؟؟ ليه الشاب يفضل يحوش كل ده طب هو يستاهل؟ انا مش عارف بس بجد بقيت محبط من الجواز معنديش اي حاجه تشجع الواحد انه يتجوز اهو يصبر لحد ما يلاقي بنت واهلها يرضوا. الله انا بحمد ربنا على نعمة ان الواحد مش مرتبط وان اخر اهدافه ان يجيب السفره و لا الاجهزه الكهربائيه.
الناس بقت طماعه اوي والشباب بقى تعبان جدا من الي بيشوفوا اذا كان قلة مرتب غلو اسعار ولا الي بيشفوا في الشارع ولا في التلفزيون.
ربنا يرحمنا..

10 comments:

Sarah Abdul

Deary msh kol l nas bfaker kda nas kteeer btfaker fe a5la2 we din we t2ol l flos tegi b3d kda , bs l donia 7zooz :D.yato23 kda ya to23 kda :D.

Hanaa Tag el Din

y3eni ya ramy da enta mosh mo7bat da enta shyeel kter awy mt3milsh f nfsak kda :D
i guess en sara 3ndaha 72 mosh kol el nas 3wza 7agat gamda awy w b3deen fee nas rbna bykrmhom , bs fee nas lazem el 2ol yb2o koyessen mn gowa ( el klam l nas :D) w b3den mt32adsh nfsak m7dsh 2lk 7wesh lma tl2yha hya 7t7wshlak :D

Rehab Mostafa

ياعيني يابني
عارف يارامي والله بحمد ربنا اني بنت علشان اللي بتقوله ده ربنا يعلم الشباب صعبانين عليا أد ايه خصوصاً اني شوفت معاناة خالي وولاد خالتي ولسه أخويا :))
والله انتو بتتعبوا اوي بس عايزه أقولك على حاجه بجد في بنات مش بيكونوا طالبين كل اللي بتقوله ده أولاً ليه شبكه ب10 ألاف لو مش معاك ولو معاك حتى وليه فرح بكام ألف ده 10 دوول فرح أييييي كلام وليه مهر 10 برضه وبعدين نسيت المؤخر ده ده لوحده مشكه :)) أنا أعرف جوازات كتير اتفركشت علشانه بس قول ده بيتدفع بعدين بس ال10% بتاعته للمأذون
بس والله يارامي مجرد انك تلاقي بنت الحلال واللي يكونوا أهلها كويسين وبيشتروا راجل زي مابيقولوا (المفروض مدام هما اللي بيشتروا يدفعولك بقى) المهم بجد مجرد ماتنوي ربنا هيكرمك ماتعرفش منين ولا ازاي بس بتلاقي الدنيا اتسهلت لوحدها ان شاء الله وربنا يكرمك يارامي يابني ويرزقك ببنت الحلال اللي تسعدك ويرزقك برزقها:))
أي خدمه دعوه من الست جدتك :)
والله في ناس مهم أوي عندهم الأخلاق والشخصيه قبل أي شيء بس دور كويس يمكن تلاقي صفي نيتك كده وانت ربنا هيكرمك :)
وبلاش احباط بقى ياعم رامي ... عايزين نحضر كتب كتابك قريب ومش لازم تعمل فرح
وربنا يرحمنا:)

khaled adel

على فكرة 150 ده قليل جداً لو بتتكلم انك لسة هتجيب شقة
بس ممكن تجيب شقة ايجار وتوفر ال 100 الف رغم ان مفيش شقة ب 100 تقريبا
مش هقلك كلام كتير
بس اقرا الحديث ده
ثلاثة حق على الله عز وجل عونهم: المكاتب يريد الأداء، والمتزوج يريد العفاف، والمجاهد في سبيل الله
فلو انت مش واثق فالله عز وجل انه هيعينك
او مش واثق انك تريد العفاف :P
يبقى حقك تتعقد
غير كده اعتمد على الله وخلي ثقتك فيه اكبر من كده
حتى لو المرتب 100 جنيه مش 1000
وربنا يعينك ويوفقك كده لزوجة صالحة

Mohamed Moshrif

100K only for the apartment :)?
I'll buy 2 if I can find them in this price :)

Mohamed Moshrif

Also 25K only for furniture :)?
I thought you can only get a good bedroom with that price in EG now :)?!

Ahmed Mubarak

وطبعا اهلها عاوزين حاجات اد كده ممكن تعدي المبلغ الي فوق. فا انا شايف للشباب انها صفقه خسرانه. للبنات و لا فرقا معاها
بصراحة انا معاك في ديه تماما
ومعاك اكتر فيها من ناحيه الاستغلال وناحيه الاهل
بالنسبه ليا انا ليا راي .. لو اي حد قابل اهل كده بيع في ثانيه ومن غير تردد لان بنتهم هتكون زيهم

لانها فعلا صفقه خسرانه للشاب لان الي حاطط في دماغه الشكل والمظهر علشان الناس متقولش مش علشان ينفذ الصح ووصيه الرسول ده اسوء اختيار ممكن تقع فيه
لان الي مش خايف من ربنا علشان الناس يبقى مش عايز ربنا .. والي وخدها استغلال على الفاضي علشان بنتي او ابني ميتجوزش غير كده يشرب بقى

تحياتي يا ريس

Rehab Mostafa

أنا بنت والمفروض اني ابقى متحيزه بقى والكلام الكبير ده بس أنا مع كلام خالد ومبارك
ساعات أهل البنت بيسلخو (ملهاش معنى غير كده معلش) الراجل اللي جاي يتقدم لبنتهم ولا كأنهم حاسين بالظروف ولا عايشين في البلد ولا ان والد البنت يفتكر نفسه لما كان في موقف العريس ده في يوم من الأيام (مع ان الظروف اتدهورت قصدي اتغيرت)
ربنا يرزقك بقى يا رامي بناس كويسين ويشتروا راجل :D
تالت بوست أشوفوا يتكلم عن الزواج بطريقه سوداويه
تفائل خير يارامي .. قال يعني العرايس واقفه طوابير وانت محتار
وملحوظه صغيره أخيره ومش هاجي أعلق تاني ماتخافش:: رغم الظروف اللي فيها البلد وأحوال الشباب لكن موقف الشباب برضه في السنوات الأخيره دي أحسن كتير من زمان

Mostafa Salem

السلام عليكم
رامي باشا و حشتنى و الله بقالى كتير مشفتكش, انا كنت ماشى فى النت و بدور على بلوج واحد صحبى , فأفتكرت انك حاطط بلوجات الناس عندك , المهم اتشنكلت فى الموضوع دة , و طبعا مش محتاج اقولك كم
الكآبة اللى نزلت عليا , و قلت اية اللى دخلنى النهاردة مكنت نمت بدرى زى كل يوم

انا فى واحد اعرفة من الهند
المهم الولد دة كنت بتكلم معاة فى مرة عن مشاكل الشباب فى الجواز
و سبحان الله قعد يضحك
وقالى احنا معندناش المشكلة دة
انت كل اللى عليك تختار و تنقى و الباقى على العروسة
لو تحب اعرفك علية قولى
بالمناسبة هو شغال اوراكل

Ahmed Essawy

انا معاك ان الشباب في ورطه رغو ان المفروض يكونو قلب و قوه المجتمع و حالتهم مش ظريفه و احيانا كتير بتصعب عليا نفسي و احيانا اكتر بيصعب عليا الناس الي حواليا ...في بشر بالهبل دماغهم حلوه لكن فلوسهم مش كويسه خالص و بيتذلو و بيستحملو علشان خمسميت جنيه بالكتير
و كانو من اوائل كلياتهم و كمان من كليات القمه
انا اعرف ناس كليه اعلام شغالين ب ربعيه و خمسين
و اعرف واحد خريج طب يأس من مصر و اشتغل حارس مدرسه ثانوي في الكويت و اكيد انت شوفت من العينات دي كتير
العجيب في امر الناس دي ان رغم ان ممكن يكونو مقهورين من حالهم و من جواهم و لكن شغالين و مقعدوش في البيت و دا لان عندهم مبدأ ..مبدأ ان اعمل الي عليا و الباقي علي ربنا
مبدأ ان الانسان لازم يسلك طريق النجاح و لكن غير مطالب بالوصول
للنجاح ذاته...زي بالظبط الي عنده امتحان ..كل الي مطلوب انك تذاكر كويس ...و تعمل الي عليك ...اما تنجح او تسقط دي بتاعه ربنا ...
لازم يكون عند الواحد ثقه بالله و يتوكل علي الله
وزي ما قال النبي صلى الله عليه وسلم: (ثلاثة حق على الله عونهم: المجاهد في سبيل الله، والمكاتب الذي يريد الأداء، والناكح الذي يريد العفاف)
الترمذي، وأحمد، والحاكم
و انت اكيد مقتنع بالكلام دا بس سعات الواحد بيعيش ساعات احباط مزينها الشيطان و انا شايف انك عايشها ساعه كتابه المقال
و انا كمان فعلا كنت محتاج اسمع نفسي الكلمتين دول دلوقت ...
و الرسول برضو قالنا
صلى الله عليه وسلم: "عجبا لأمر المؤمن إن أمره كله خير، إن أصابته سراء شكر، فكان خيرا له، وإن أصابته ضراء صبر، فكان خيراً له"
كل شئ مقدر الانسان وهو خير له . المصيبه خير له . البلاء خير له .
فأهم شئ يميز الانسان و يظهر مدي ايمانه و مدي ارتباطه بربه ؛ يظهر قد ايه الواحد فينا راضي بقضاء ربنا هو
الصبر و الشكر
ففي الصبر و الشكر علاج نفسي رهيب ينقي و يطهر الانسان من كل ضر و فاسد تتسامي فيه علاقه الخلق بالخالق .

----------
بعيد عن كدا ...اكيد عندي مشكله في الفلوس بحكمي شاب من ابناء هذا الجيل و لكن انا شايف ان المشكله اساسا اكبر من كدا ..علي قد ما الفلوس بقت حاجه صعبه قوي و عمله نادرة علي قد ما بقي انك تلاقي بنت بستاهل بهدلتك و فعلا شارينك هي الوجهه الاخر لنفس العمله نادره

---------
اخر حاجه انت مبالغ شويه في بعض الارقام
و كمان مش لازم تشتري شقه ممكن تأجر ..انا اعرف ناس كتير عملو الموضوع دا
منين عايز تكون ناكح و تريد العفاف و منين حاطط 175
عارف ان ميه وخمسه و سبعين مش كتير اليومين دول و و اعرف ناس بتعمل العفش بالرقم دا بس
صدقني لو لقيت الي فعلا مقدراك حتعيشو بأقل التكاليف و البنت او اهلها الي يوقفو جوازة علشان فلوس و لو ربع جنيه يبقي متستهلكش و في حاجه في المعادله غلط
ولا يمكن تستمر معادله غير موزونه
اعرف ناس اتجوزت و الجهاز مش كامل و الخطوبه كانت دبل و العفش الي جه كان
مش حاجات فظيعه و كلها قطعت ثمانيه الاف مصري من محلات التوحيد و النور
انا مش بقول اشتري من التوحيد و النور و لا بقول هات دبلتين و بس
انا بقول دور علي البنت الي حتعيش علي الي معاك بظروفك و بظروف الي انت برضو ترضاها لو جه حد لاختك
لو مش شايف انت حتي وصلت للنقطه دي ... يبقي تستني بس تعمل الي عليك و كلك ثقه في الله
و الله المستعان