مرض التحرش #EndSH

كلمه مسيره للاشمئزاز زي ما قالت سلمى في تدونيتها، الي بيعتبر جزء اتفق عليه مدوني ومغردي مصر ولبنان، وبما اني مصري قاعد -لفتره قصيره- في لبنان فا وجب عليّا التدوين :)


انا هتكلم بصفه شخصيه وبالله عليك افهم كلامي كأنسان ومتقولش اصل مرجعيته كذا وكذا فا علشان كده بيقول الكلام ده... التحرش مرض والمرض له اعراض وتشخيص وفتره شفاء وفوق كله في دواء لازم نلتزم به علشان المجتمع او الشخص يخف من المرض ده


اعراض  - Symptoms
- أحساس الفرد ان الكائن الاخر هو جسد للمتعه فقط.
- الانزلاق لكل متعه يقودها الجنس الاخر له. امثله وليس على سبيل الحصر. الي يروح محل علشان فيها بنت مزّه ونفسه يكلمها ويخرج معاها، يروح فيلم علشان الممثله عمله مشهد ولبسه فيه -قصدي مش لبسه خالص، يبعت الهارد بتاعه لصاحبه يحشهوله كام جيجا افلام ابيحه ويا حبذا فيلم (ان كت)، متعته في البيت لما يكون لوحده والكمبيوتر معاه والشيطان ثالثهما، معاملة الجنس الاخر في العمل او الدراسه بطريقه غير لائقه، حب الهزار باليد، خصوصاً ان البنت الي بتمشي في الشارع لازم يتقالها كلمتيين علشان اي سبب كان لبس، لون اللبس، المكياج، الخ وده بيحسس بعض الشباب بكتمال الرجوله وانه كده بالصلاه ع النبي دكر!


التشخيص - Diagnosis 
لو شخصّنا كل المتحرشيين هنقسمهم لنوعيين -ممكن ميكونش نفس الانواع- بس ده الي في بالي
- النوع الاول: التحرش الشوارعي ده بيتحرش في الشارع يا باللفظ او اليد وده سماته معروفه
- عواطلي مش لاقي حاجه يعملها
- دماغه مفسيّه.. ولو شغال شغلانه مش بيفكر في اي شيء غير انه ياكل والبنات للجنس بس... ديه مش واحده ديه "فرده قلّاب" فاضي النهارده يا جميل؟!
- خصوصا بقى لما يشوف اجنبيه يستلهم ثقافته المكتسبه ان الاجنبيات بيحبوا المصريين وجيين علشان مفيش رجاله عندهم ومستنينوه يحن عليهم بكلمه علشان يخدوه الفندق
- بعيد عن اخلاقيات الاديان السماويه كافة
- بيقعد على القهوه\الشارع اكتر ما بيقعد مع اهله، واصحابه من نفس العينه
- النوع التاني: التحرش الي في الشغل او الدراسه
- شب زي الي فوق بس شهوته سبقه عاقله
- الاختلاط ملهوش حدود، وبيهزر بكل حاجه وبيتكلم في كل حاجه ويقولك تحرر وده انا بقول عليه شحن


العلاج - Treatment
- الاعلام: الاعلام في مصر فعلاً لازم يبدأ يوعيّ، الافلام لازم ميبقاش فيها اي مشهد خادش للحياء، انتوا بتشحنو الشباب بالممثله الي كل جسمها "باظظ" بره اللبس؛ مهو نفسه يلمس ويبوس انتوا بتفكره بكل الكلام ده وهو مش لاقي علشان يتجوز؟؟
- الاحتشام في اللبس -مش السبب الوحيد- بس لازم لازم.
- الاباء والامهات بالله عليكم سهلو الجواز... ومش محتاج اجيب احاديث وشواهد على تأخير الزواج وعدم سهولته بيعمل ايه
- الطاقه السلبيه... العبو رياضه، متقعدش لوحدك، متقعدش على القهوه\الشارع "ئاطر" الي رايحه والي جايه، اختار صحابك وابعد عن لصنف ده.. والله لو متجوز واصحابك كده هتبقى زيهم وتبقى شب متحرش
- الرجوع لأخلقيات الدين... الدين الدين الدين
- الفن لو هيفضل سيء ابعد عنه... ابعد عن الافلام الي بتثير الغرائز الي هي الافلام السينمائيه اكتر منها افلام ابيحه
- الزم حدودك مع الجنس الاخر بلاش الهزار الي بالايد
- وانت رايح تتحرش افتكر انها امك
- الي تشوفه بيتحرش خلي عندك دم ورجوله ومروءه وروح واضربه واضرب الي يتشددله... ومرمت بكرامته الارض يمكن لمّا يعرف انه رخيص يفوق
- متسكتش على حد عاكس بالكلام علشان بكره هيمد ايده لو محدش وقفه
- وجود شرطه امنيه عند مدارس البنات وعدم السماح بوقوف الشباب هناك الا لو من اهل بنت من البنات وعدم السماح بوجود مجموعات ووضع قانون بذلك
- البلد لازم تحبس الي بيتحرش وتعدم الي بيغتصب علنياً في ظل قانون صارم معمول به في البلاد

Daily news 21/1

الحمد لله... اليوم كان عنيف... بداية من امبارح بليل حيثُ الارق... ونمت الساعه تقريباً 6.5 وصحيت الساعه 10.25 وربع مش وخمسه وعشرين دقيقه :) النهارده هحكي موقف... موقف مؤثر والله... يدل اننا شعب طيب... وسط مشاكلنا بتوه رؤيتنا لطبيتنا... مش بناخد بالنا منها... ولا حسّين بيها...
انا ساكن في وسط البلد... نزلت من البيت على الساعه 12 اروح اجيب من شركتي القديمه ما يثبت انه مشيت منها علشان اعمل كعب عمل للشركه الجديده. النهارده الخميس لازم اعمل كعب العمل قبل ما اروح الشغل يوم الاحد... مفيش وقت... النهارده نص يوم اخرهم 1.5!! روحت المهندسين ورجعت على وسط البلد وعملت كعب العمل ورجعت على المهندسين تاني علشان اسلمه للشغل الجديد وبعد كده رجعت البيت!!
انا روحت مكتب العمل (الي بطلع منه كعب العمل الساعه 1 ونص وخمسه) قبلت الموظفين على السلم... استنوا بس... قبل ما اروح سألت هو فين مكتب العمل انا عارف الشارع بس بنسى العماره كل مره... قالي العماره الي جنبي بس الحق علشان النهارده نص يوم... روحت على طول لقيت الموظفات نازلين قولتلهم حضرتكم تبع مكتب العمل؟ قالولي اه بس احنا قفلنا خلاص... قولتلهم أصل انا جيت يوم الاتنين علشان اعمل كعب العمل... بس كنت لازم اجيب استماره 6 وعلشان التأمينات لحد النهارده مخلصتهاش وانا لازم اجيب كعب العمل واسلمه لشغلي الجديد قبل يوم الاحد روحت رايح شغلي القديم وجبت إخلاء طرف... ولسه راجع حالاً من المهندسين... قالتلي والله الموظفه بتاعت كعب العمل مشيت... قولتلها والله مصدقك ربنا يكرمك قالتلي تعالى الساعه 8.5 يوم الاحد ونخلصهالك :) قولتلها شكرا جدا...ربنا يباركلك... المفاجأه واحده منهم قالتلها لا ميجيش يوم الاحد احنا نطلع نعملهالو :)) هما موظفات شؤون عاملين بس الشغل الحكومي بالعشرهٌ بيتفهم... هما 2 ستات عمرهم من 45 لي 55 سنه... طلعوا السلم الرخم علشان يساعدوني... وعملولي كل حاجه... والله كان ناقص يكتبولي الورقه الي المفروض املاها انا... أم تاتشد بجد... مين قال ان الخير مش موجود... اعلم تمام العلم لو كنت في مؤسسه خاصه كان قالي روّح لامك احنا خلصنا... مش معناه برضه ان كلهم وحشين... بس برضه مش معناه ان كل الموظفيين وحشيين... والاعم ان بلدنا لسه بخير.


بيقول ايه الواد ده؟؟
لما روحت سألت الراجل على مكتب العمل وانا في عز اللف ده ابتسامتله ورميت عليه السلام رد عليا السلام وكلمني كويس ونبهني اني الحق قبل ما يقفلوا مع انه ميعرفش اني مستعجل ولا فارق معاه اعمله ولا معملوش... كان مكتب تصوير ومحاولش يقولي طيب مش هتصور وتصور؟! 
لما قبلت الموظفات كلمتهم بكل إحترام معلتش صوتي عليهم وشكرتهم قبل ما يقدمولي المساعده وكنت مقدر اد ايه اني انا غلطت اني اتأخرت مقولتلهاش يعني انتي هتتعبي لو طلعتي.
الشاهد ان الخير وحسن المعامله بيجيب نتيجه ونتيجه كويسه جدا.


شكراً للي طلبت منهم يدعولي... أكيد كان سبب من أسباب التوفيق :)

يعني ايه؟

يعني ايه وطن؟ يعني ايه ضعيف؟ يعني ايه انتماء؟ يعني ايه تعذب نفسك واهلك وكل انسان بيحبك؟ يعني ايه دين؟ يعني ايه حياه؟ يعني ايه طاعه؟ يعني ايه شريعه؟ يعني ايه حب ربنا وعباده؟


الآيات ديه هي الأجابة بتاعتي


لَّا يَسْتَوِي الْقَاعِدُونَ مِنَ الْمُؤْمِنِينَ غَيْرُ أُولِي الضَّرَرِ وَالْمُجَاهِدُونَ فِي سَبِيلِ اللَّـهِ بِأَمْوَالِهِمْ وَأَنفُسِهِمْ ۚ فَضَّلَ اللَّـهُ الْمُجَاهِدِينَ بِأَمْوَالِهِمْ وَأَنفُسِهِمْ عَلَى الْقَاعِدِينَ دَرَجَةً ۚ وَكُلًّا وَعَدَ اللَّـهُ الْحُسْنَىٰ ۚ وَفَضَّلَ اللَّـهُ الْمُجَاهِدِينَ عَلَى الْقَاعِدِينَ أَجْرًا عَظِيمًا ﴿٩٥﴾ دَرَجَاتٍ مِّنْهُ وَمَغْفِرَةً وَرَحْمَةً ۚ وَكَانَ اللَّـهُ غَفُورًا رَّحِيمًا ﴿٩٦﴾ إِنَّ الَّذِينَ تَوَفَّاهُمُ الْمَلَائِكَةُ ظَالِمِي أَنفُسِهِمْ قَالُوا فِيمَ كُنتُمْ ۖ قَالُوا كُنَّا مُسْتَضْعَفِينَ فِي الْأَرْضِ ۚ قَالُوا أَلَمْ تَكُنْ أَرْضُ اللَّـهِ وَاسِعَةً فَتُهَاجِرُوا فِيهَا ۚ فَأُولَـٰئِكَ مَأْوَاهُمْ جَهَنَّمُ ۖ وَسَاءَتْ مَصِيرًا ﴿٩٧﴾ إِلَّا الْمُسْتَضْعَفِينَ مِنَ الرِّجَالِ وَالنِّسَاءِ وَالْوِلْدَانِ لَا يَسْتَطِيعُونَ حِيلَةً وَلَا يَهْتَدُونَ سَبِيلًا ﴿٩٨﴾ فَأُولَـٰئِكَ عَسَى اللَّـهُ أَن يَعْفُوَ عَنْهُمْ ۚ وَكَانَ اللَّـهُ عَفُوًّا غَفُورًا ﴿٩٩﴾ وَمَن يُهَاجِرْ فِي سَبِيلِ اللَّـهِ يَجِدْ فِي الْأَرْضِ مُرَاغَمًا كَثِيرًا وَسَعَةً ۚ وَمَن يَخْرُجْ مِن بَيْتِهِ مُهَاجِرًا إِلَى اللَّـهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّـهِ ۗ وَكَانَ اللَّـهُ غَفُورًا رَّحِيمًا